மதுரை சௌராஷ்ட்ர சபையின் அரும்பணிகள்- Madurai Sourashtra Lord Marriage

அடியேன்  13.07.2011 அன்று அறுபது அகவையை நிறைவு செய்தேன்.  எனவே இறைவனுக்கு நன்றி சொல்ல வேண்டும் என்ற அடியேனது கருத்தை நண்பர்களிடமும் உறவினர்களிடமும் கூறினேன்.  சிலர் திருக்கடையூருக்குச் சென்று பூசை செய்யுங்கள் என்று கூறினார்கள்.  சிலர் புரோகிதரை வைத்து மதுரையில் ஒரு திருமண மண்டபத்தை வாடகைக்குப் பிடித்து அனைத்து உறவினர்களையும் அழைத்து ஓமம் செய்து கொள்ளலாம் எனக் கருத்து தெரிவித்தனர்.  அப்போது அடியேனது  வயது முதிர்ந்த உறவினர் மதுரை தெற்குக் கிருஷ்ணன் கோவிலில் அமைந்துள்ள சௌராஷ்ட்ர சபைக்குச் சொந்தமான தெற்குக் கிருஷ்ணன் கோவிலில் இறைவனுக்குத் திருமணம் நடத்தி வைப்பதாகவும் அதை மிகச் சிறப்பான முறையில் நடத்துகிறார்கள் என்றும் தகவல் தெரிவித்தார்.

உடனே நான் தொலைபேசியில் மதுரையில் உள்ள என் நண்பரைத் தொடர்பு கொண்டு இதுகுறித்து விசாரித்துத் தெரிவிக்குமாறு கேட்டுக்கொண்டேன்.  அவர் இருநாட்களுக்குப் பின்,“சபைக்கு ரூ.3000 கட்ட வேண்டும் என்றும் புரோகிதரைச் சந்தித்துப் பிற விபரங்களைக் கேட்டுத் தெரிந்து பிற பணிகளுக்கான  செலவினத்தைத் தெரிந்து கொள்ளும்படி கூறியதாகவும் கூறி, அதற்கு உத்தேசமாக மேலும் ரூ.3000 செலவாகும் என்றும் தெரிவித்தார்.  உடன் சௌராஷ்ட்ர சபைக்குச் சொந்தமான விருந்தினர் விடுதியை முன்பதிவு செய்தேன்.  சபைக்குக் கட்ட வேண்டிய பணத்தைக் கட்டினேன்.  புரோகிதரிடம் விஷயத்தை விளக்கி 15.07.2011 அன்று நிகழ்ச்சி நடத்த தேதியும் குறித்தேன்.

திருமணம் இறைவனுக்குத் தானே என்று சட்டையுடன் கோவிலுக்குச் சென்றேன்.  புரோகிதர் சட்டையைக் கழற்றி பஞ்சகச்சம் போட்டுக் கொள்ள வேண்டும் என்று கூறினார். ஏன் எனக் கேட்டதற்கு இறைவனுக்குத் திருமணம் நடத்த பணம் கட்டியவர்கள் ஓமகுண்டத்திற்கு முன் அமர வேண்டும் எனக் கூறினார்.  உறவினர்களும் நண்பர்களும் உரிய நேரத்தில் - காலை ஒன்பதரை மணி முதல் வரத் தொடங்கினார்கள்.  வெள்ளிக்கிழமை இராகுகாலம் பத்தரை மணி முதல் பன்னிரண்டு மணிவரை.  ஆனால் இறைவனின் திருமணத்திற்கு இது பொருந்தாது எனப் புரோகிதர் தெரிவித்தார்.  பணிகள் துவங்கின.  மிக அருமையாக - அற்புதமாக இறைவனின் திருமணத்தை நடத்தி வைத்தார் அந்த புரோகிதர்.  கட்டு கட்டாக தாலிக்கயிறு இறைவன் மேல் சாத்தி இருந்தார்.  திருமணம் முடிந்தபிறகு தரப்படும் என்று தெரிவித்தார்.

இறைவனின் திருமணம் பற்றி மிக அழகாக எடுத்து விளக்கினார் அந்த புரோகிதர்.  தனிப்பட்ட முறையில் நாம் ஓமம் செய்து கொண்டால் நமக்கு மட்டுமே நன்மை என்றும் இறைவனுக்குத் திருமணம் செய்து வைத்தால் உலக மக்களுக்கே நன்மை உண்டாகும் என்றும் - எனவே சமூக மக்கள் இறைவனுக்குத் திருமணம் செய்து வைத்து பலனடைய வேண்டும் என்றும் எடுத்துக் கூறினார்.  அவரிடம் அனுமதி பெற்று என் நண்பர்கள் புகைப்படம் எடுத்தனர்.  அதை இத்துடன் பதிவு செய்துள்ளேன்.  சௌராஷ்ட்ர இனத்தைச் சேர்ந்த நண்பர்கள், பெரியோர்கள் அனைவரும் தங்கள் வீட்டு விசேஷங்களின் போது இறைவனுக்குத் திருமணம் நடத்தி இனநலத்தைப் பெருக்கும்படி கேட்டுக் கொள்கிறேன்.

இது குறித்த காணொளிக் காட்சிகள் யுட்யூப்பில் மதுரை லார்ட் மேரேஜ் என்ற தலைப்பில் தேடினால் மூன்று பகுதிகளாகக் கிடைக்கும். (Madurai Lord Marriage or Madurai Sourashtra Lord Marriage)

new basic letters of sourashtra language - reg

உடல்நலம் இல்லாத காரணத்தால் என் பணியினைத் தொடர முடியவில்லை.  உடல்நலம் சீராகிவிட்ட படியால் மீண்டும் நான் கற்றதை உங்களிடம் பகிர்ந்து கொள்கிறேன்.

என் கருத்தை ஏற்றுக் கொள்ள வேண்டுமென்று யாரையும் நான் கூறவில்லை.  நான் படித்ததை - என் மனதில் பட்ட கருத்தினை எழுதியுள்ளேன்.

மாறுபட்ட கருத்து உள்ளவர்கள் இத்தொடரினைப் புறந்தள்ளிவிடலாம். தங்களுக்குச் சரியெனப் பட்டதை அடுத்தவர் மீது திணிக்க முயலவேண்டாம்.

நான் தாயகம் திரும்பியவுடன் நண்பர் ஒருவர் பல அருமையான நூல்களை எனக்குத் தந்தார்.  அவற்றிலே ஒன்று சொளராட்டிர மொழியின் அடிப்படை எழுத்துக்கள் என்ற அருமையான நூல்.  மொழி அழியாமல் இருக்க வேண்டும் - எளிதில் உலகெங்கும் உள்ளவர்கள் படித்துப் புரிந்து கொள்ள வேண்டும் - கணினிக்கு ஏற்ற முறையில் கணியில் ஆதிக்கம் உள்ள ஒரு மொழியின் எழுத்தையே நடைமுறையில் வைத்து - மிக எளிமையாக பேராசிரியர் ஆர்.கிருஷ்ணமூர்த்தி என்பவர் ஒரு நூலை வெளியிட்டுள்ளார்.  அந்த நூல் எழுந்த வரலாறு - அதை ஏற்றுக் கொண்ட அமைப்புகள் - தலைவர்கள் - இயக்கங்கள் பற்றி எல்லாம் மிகத் தெளிவாக அந்த நூ-ல் கூறப்பட்டுள்ளது.  இந்த நூலை பி.டி.எப். எனப்படும் பிரதியாக மாற்றி அமெரிக்காவில் வாழும் குசராத்தி நண்பருக்கு அனுப்பினேன்.  அவர் உடனே "இப்போது உங்கள் மொழியை என்னால் எளிதில் படிக்க முடிகிறது.  தமிழில் உள்ள பொருளை மட்டும் இந்தியிலோ அல்லது ஆங்கிலத்திலோ சொன்னால் இன்னும் நன்றாக இருக்கும் என்றார்.  நானும் மின்னஞ்சல் மூலமாகப் பொருளை ஆங்கிலத்தில் கொடுத்தேன்.  இப்பொழுதெல்லாம் அந்தக் குடும்பத்தினர் தங்கள் குடும்ப விழாக்களில் என் மகன் குடும்பத்தையும் அழைக்கின்றனர்.  இவ்வளவு நாள் தமிழ்நாட்டைச் சேர்ந்தவர்கள் என்று ஒதுக்கிய குசராத்திகள் இப்பொழுது இவர்கள் எங்கள் உறவினர்கள்.  எங்களைப் பிரிந்து தமிழகத்தில் வாழ்பவர்கள் என்று சொல்லத் தலைப்பட்டுவிட்டார்கள்.  எனவே பேராசியர் ஆர்.கிருஷ்ணமூர்த்தி அவர்களுக்கும் சொராஷ்ட்ரா மொழியின் அடிப்படைஎழுத்துக்கள் நூலை ஏற்றுக் கொண்ட அமைப்புகளுக்கும் நிர்வாகிகளுக்கும் - அதை வெளியிட உதவிபுரிந்த அனைத்து நண்பர்களுக்கும் மிக்க நன்றி.